На 28 октомври беше отворена изложбата на фотографии "Кокино-мистичен шепот низ вечноста" и промовирана книгата "Портал на сонцето" поетски избор од 42 современи поети од Р. МАкедонија, на бугарски јазик.
За изложбата посветена на Кокино зборуваа директорот на нашиот Центар во Софија Васко Шутаров, авторот на изложбата Љупчо Илиевски и Елизабета Кузмановска, од име на Дирекцијата за култура и уметност на град Скопје. Низ 30 фотографии, авторот Илиевски пред публиката во Софија го претстави своето уметничко но и лично доживување на овој наш археолошки локалитет и воедно, светски позната мегалитска обсерваторија.
Во вториот дел од програмата беше претставена книгата со избор од македонската поезија на бугарски јазик, авторско дело на бугарскиот поет и преведувач Роман Кисјов. Во ова обемно поетско дело, застапени се 42 поетски имиња од сите генерации македонски поети, претставени со вкупно 385 песни. Книгата беше претставена од авторот Кисјов и претставникот на бугарското книгоиздателство "Ерго" МАртин Христов. Стихови интерпретираа Ѓорги Георгиев-Антика и Тодор Тодоров. Поетскиот дел од програмата со свои читања го збогатија академик Катица Ќулавкова и Владимир Мартиновски.
