По иницијатива на Советот на Европа секоја година на 26 септември се чествува Европскиот ден на јазиците. По повод Европскиот ден на јазиците, во оваа 2023 година, се одржува традиционалната онлајн игра од 6 до 30 септември, за која што информација може да се најде на: https://edl-bulgaria.eu/
На 30 септември, од 10 до 14:00 часот, во Градскиот парк спроти Народниот театар во Софија ќе бидат поставени штандови на одделните странски културни центри и амбасади во Бугарија, на кои посетителите ќе имаат можност да добијат повеќе информации за европските јазици и култури.
На македонскиот штанд своја програма за посетителите ќе води режисерот и актер Ѓорги Георгиев – Антика, придружуван од актерот Игор Дамјанов. Посетителите ќе имаат можност да се здобијат со брошури и каталози од Република Северна Македонија.
Македонскиот КИЦ во Софија за седми пат зема учество на овој значаен културен настан.
За повеќе информации од сајтот на Европскиот ден на јазиците: https://edl.ecml.at/ и на: https://www.facebook.com/translatingforeurope
